Фанни молиялаштириш ҳажми ошади
Қозоғистонда ер ости бойликларидан фойдаланувчилар ҳисобига фанни молиялаштириш 25 фоизга оширилиши режалаштирилган. Бу иш ҳар йили амалга оширилади. Қоидага кўра, турли ер ости бойликларини қазиб олувчи компаниялар харажатининг 1 фоизини тадқиқот ишларига йўллаши зарур.
Бугунги кунгача корхоналар илмий институтлар билан молиялаштириш тўғрисида бевосита шартнома тузарди. Энергетика вазирлиги тарқатган маълумотга кўра, келгуси икки йил давомида бу йўналишда ажратиладиган маблағлар алоҳида бюджет дастурига киритилади. Давлат бу маблағни зарур илмий тадқиқотларга тақсимлайди. Барча молиялаштирилаётган лойиҳалар давлат илмий-техник экспертизасидан ўтади. Вазирликда таъкидланишича, бундай чора-тадбирлар ажратилган маблағлар шаффоф сарфланишини таъминлайди. Шунингдек, мазкур маблағ ҳисобидан мамлакат олий ўқув юртлари базасида 15 та илмий лаборатория ва 10 та тадқиқот маркази очиш режалаштирилган.
Абдумалик Сарманов таржимаси
