Аризоналық үндістер мен қазақ халқының қандай ұқсастығы бар?
Солтүстік Америкадағы үндістердің ішінде ең үлкен тайпа саналатын – Навахоның қазақ халқымен қандай ұқсастығы бар? Бұл тайпаның да бұрыштарға ұрынбай өмір сүру философиясын ұстанғаны қай нәрседен белгілі? Шежірені білуді парыз санаған навахолар неше атаға дейін қыз алыспайды?
Жылқы жануары тұңғыш рет қазақ даласында қолға үйретіліп, өзіндік реңктегі өркениет ретінде дүйім дүниеге тарапты. Оған еліміздің солтүстігіндегі – энеолит дәуіріне жататын «Ботай» қонысынан табылған археологиялық жәдігерлер айғақ. Бұл орайда, Америкалық үндістердің де – өздерін ер үстінде еркін сезініп, айтар ойларын атпен сабақтауы, тегіннен емес, тегінен-ау. Алтайдан шыққанын аңғартып тұрғандай. Осы бағытта ой қозғап, тың мәліметтер жинап жүрген – «Бабалар ізімен» ғылыми экспедициясы Уолнат шатқалындағы үндістердің көне қоныстарын көргеннен кейін, Флагстафф арқылы Пейдж қаласына бағыт алды. Мұнда Навахо тайпасының үлкен резерваты бар.
