Ревакцинация 22 қарашада басталады

«Pfizer» вакцинасының алғашқы топтамасы Қазақстанға 15 қараша дейін жеткізіледі. Бұл туралы Үкімет отырысында ҚР Денсаулық сақтау министрі Алексей Цой хабарлады. Министр мәлім еткендей, коронавирусқа қарсы аталмыш препараттың 4 миллионнан астам дозасы сатып алынған. Алғашқы партия 379 мың доза көлемінде жеткізіледі деп күтілуде.

Алексей Цой, ҚР Денсаулық сақтау министрі:

- Балаларды, жүкті және бала емізетін әйелдерді коронавирус инфекциясына қарсы вакцинациямен қамтамасыз ету мақсатында 4 млн 230 мың доза вакцина сатып алынды. Бұл 2 млн 115 мың адамды қамтуға мүмкіндік береді. Вакцинация 12-17 жастағы балаларға, жүктілік мерзімі 16-37 апталық жүкті әйелдерге және босанғаннан кейін 42 күннен соң бала емізетін әйелдерге жүргізіледі. «Pfizer» вакцинасын сақтау ерекшелігін ескере отырып, бүгінде 34 мұздатқыш сатып алынды және еліміздің 16 өңіріне жеткізілді.

Сондай-ақ министр елімізде ревакцинация 22 қарашада басталатынын, онымен ең алдымен халықтың тәуекел тобына жататын азаматтар қамтылатынын мәлімдеді.

Авторы: Ақзер Сегізбай