Қазақстанның бас санитар дәрігері жаңа қаулыға қол қойды

Қазақстанда қызмет көрсету саласының қызметкерлері 15 шілдеге дейін вакцина салдыруға міндеттелді. Екпе алмағандар жұмысқа жіберілмейді. Бұл туралы елдің бас санитар дәрігерінің жаңа қаулысында айтылды. Осылайша, тізімге сауда және ойын-сауық орталықтары, тамақтану орындары, театрлар мен кинотеатрлар, дәріханалар, халыққа қызмет көрсету орталықтары, екінші деңгейлі банктер және басқа да көптеген компания мен кәсіпорындар енді.

«Егер қызметкер вакцина қабылдамаған болса, онда ол 7 күн сайын ПТР-тестілеуден өтуге міндетті болады. Тұрақты медициналық қарсы көрсетілімдері бар және соңғы 3 ай ішінде COVID-19-бен ауырып жазылған адамдар екпе алудан босатылады», – делінген хабарламада.

Эпидемиологиялық ахуалдың нашарлауына байланысты карантин режимі бас қалада үшінші рет күшейтіліп отыр. Мониторингтік топтар карантиндік шаралардың сақталуын бақылау мақсатында тәуліктік режимге ауыстырылды.

Нұр-Сұлтан қаласы бас санитар дәрігері Сарқыт Бейсенованың қаулысы 2 шілдеден бастап күшіне енеді. Оған сәйкес елорда күніне орай бұқаралық іс-шаралар өткізуге тыйым салынады. Ал 4-ші шілдеден бастап тамақтану мекемелерінің жұмыс уақыты қысқартылып, қоғамдық көліктердің қозғалысы тоқтатылады.

×