Дулат Исабековтың «Бөрте» пьесасы Австралия театрында қойылады

14.07.2022, 16:44

2022 жылдың қазан айының 4-жұлдызы. Бұл қазыналы қазақ мәдениетін  әлемге танытатын күндердің бірі десек артық айтпаспыз. Австралияның Мельбурн қаласында «Бөрте әлем ханшасы» спектакілінің тұсауы кесілмек. Сахналық қойылым көзі тірісінде аңыз адамға айналған отандық жазушы, драматург Дулат Исабековтың танымал пьесасының негізінде құрылған. Қазір дайындық жұмыстары қыза түсті. Басты рөлді сомдайтын актрисаны таңдауға ерекше мән берілген.

Дулат Исабеков, жазушы:

– Еуропалық драматургтер өз шығармаларында ондаған жылдар бойы тек ер адамдарды бас кейіпкер етуді әдетке айналдырған. Әйел образы жоқтың қасы деуге болады. Олар үшін Бөрте сенсация, тың жаңалық. Шыңғысханды жақсы біледі. Бөрте жайында білетіні аз ғана.  Сондықтан олар пьессаны жай ғана Бөрте емес, Бөрте әлем императрицасы деп атады. Мен бұл атауды қуана қабылдадым.   

Дулат Исабеков премьераға өзінің қатысуы екіталай екенін айтады. Бөрте бейнесін сомдайтын шетел актерлерінің ойынын балалары бағалап қайтады. Бұл - алдағы жоспар. Ертеңгі күні Алматыда жазушының шығармашылығына арналған баспасөз мәслихаты өтеді. Онда Дулат Исабековтың жақында швед тіліне аударылған шығармаларының жинағы көпшілікке таныстырылады.

Дулат Исабеков, жазушы:

– 5 пьеса мен үш әңгіме. Оларды швед академиясының мүшесі, Нобель сыйлығының лауреаты Бенгт Самуэльсон аударды.

Жазушы шығармашылығы шетел оқырманын несімен қызықтырып, қалай  баурап алғанын өзі де білмейді. «Табыс кілтінің сыры неде екенін де айту қиын» дейді. Ұлылық қарапайымдылықта екені баршаға мәлім. Енді бір «Транзиттік жолаушы» қойылымын әлемдік театрлар сахналауға асық. Бұл туынды алдымен Санкт-Петербургте, кейін Лондонда өнерсүйер қауымның айызын қандырған еді. Дәл осы қойылым әлем сахналарындағы отандық жазушының тың еңбектерінің шеруіне бастауы болды. Ендігі кезекте -  Мельбурн. Күзде австралиялық көрермен тарихи тұлға Бөртенің бейнесін барынша танитын болады. 

 

Авторы: Жеңіс Ермұқанов